មើល​ពី​ចំហៀង​មួយ​ភ្លេត​រថយន្ត​ Lexus​ LX​ 570​ ឆ្នាំ​ 2021​ ស្រដៀងនឹង​រថយន្ត​ Mitsubishi​ Outlander​ 2019​ អញ្ចឹង

បើក្រលេកភ្នែកមួយភ្លែតពិតជាស្រដៀងគ្នាមែនទែនជាមួយរថយន្ត Mitsubishi​ Outlander​ 2019 ប៉ុន្តែវាលក្ខណះពិសេសជាច្រើនដែលខុសគ្នា

Chom Penglin
07 ធ្នូ 2019
05:49 pm
រូបភាពពី​ទស្សនាវដ្តីពិភពអេឡិចត្រូនិក
រូបភាព Automotive Cambodia

ពិតជា​គួរ​ឱ្យ​ភ្ញាក់ផ្អើល​ ពេល​អ្នក​បានឃើញ​គំរូ​រថយន្ត​ Lexus​ LX​ ដែល​ត្រៀម​ចេញ​ក្នុង​ឆ្នាំ​2021​ខាងមុខ​ បែរជា​លាន់មាត់​ថា​ បើសិនជា​រថយន្ត ​Lexus​ LX​ ចេញ​មក​រាង​ចឹង​មែន​ មើល​ពី​ចំហៀង​មួយភ្លែត​ គឺ​ស្រដៀង​ទៅ​នឹង​រថយន្ត​ Mitsubishi​ Outlander​ 2019 ​មែនទែន​។


បើ​គិត​មកទល់​បច្ចុប្បន្ន​ រយៈពេល​ជិត​មួយ​ទសវត្ស​ហើយ​ ដែល​ក្រុមហ៊ុន​ Toyota​ Lexus​ របស់​ជប៉ុន​ បាន​ផលិត​រថយន្ត​ប្រភេទ​ SUV​ កម្លាំង​ម៉ាស៊ីន​ធំ​ ដ៏​ទំនើប​របស់​ខ្លួន​ ហើយ​សង្វាក់​ផលិតកម្ម​ និង​រូបរាង​របស់​រថយន្ត​ប្រភេទ​ Lexus​ LX​ នេះ​ នឹង​នៅតែ​បន្ត​លើ​ជំ​នាន់​ក្រោយ​ៗទៀត​របស់​ខ្លួន​។

ប៉ុន្តែ​បើ​តាម​ការ​ចេញផ្សាយ​លើ​ទស្សនាវដ្ដី​ជប៉ុន​ ឈ្មោះ​ Mag​-X ថ្មី​ៗនេះ​ បាន​បង្ក​ឱ្យ​អ្នកអាន​កាន់តែ​មានមន្ទិល​ ទៅលើ​រូបរាង​របស់​រថយន្ត ​SUV​ នេះ​ ដោយសារតែ​ផ្នែក​ខាងក្រោយ​របស់​វា​ ហាក់​មាន​ភាព​ស្រដៀង​ខ្លាំង​ ទៅ​នឹង​ម៉ូដែល​រថយន្ត​ទំនើប​ ​Mitsubishi​ Outlander​ 2019​ ខ្លាំង​។ ហើយ​អ្នក​តាមដាន​ភាគច្រើន​ ក៏​លាន់មាត់​ដូចគ្នា​ថា​ បើ​ការ​ឌីហ្សាញ​លើ​ស៊េរី​រថយន្ត​តម្លៃ​ជាង២០ម៉ឺន​ដុល្លារ​នេះ​ ចេញ​មក​ដូច​រូបភាព​បែកធ្លាយ​នេះ​មែន​ គឺ​វា​កាន់តែ​កាត់​រូបរាង​ទៅ​នឹង​រថយន្ត​Mitsubishi​ Outlander​ ទៅវិញ​។

 ​

ទស្សនាវដ្ដី​ Mag​-X បាន​លម្អិត​បន្ថែម​ថា​ រថយន្ត​ Lexus​ LX​ 570​ ស៊េរី​ក្រោយ​អាច​នឹង​ងាក​មក​ប្រើប្រាស់​ប្រភេទ​ម៉ាស៊ីន​ ដូច​ទៅ​នឹង​ម៉ូ​ឌែល​ LS​ Sedan​ ដែល​ជា​ប្រភេទ​ Twin​-Tuirbo​ 6ម៉ាស៊ីន​ ជំនួស​ឱ្យ​ម៉ាស៊ីន​ 8 សព្វថ្ងៃ​។ បើដូច្នេះមែន​ មានន័យថា​ កម្លាំង​ម៉ាស៊ីន​លើ​រថយន្ត​ Lexus​ 570​ ស៊េរី​ក្រោយ​ៗ នឹង​កើន​កម្លាំងសេះ​ រហូតដល់​416​ សេះ​ ខណៈ​ដែល​LX​ 570​ សព្វថ្ងៃ​បំពាក់​ម៉ាស៊ីន​8 កម្លាំង​ 383​ សេះ​។

ក្រុមហ៊ុន​ទំនងជា​ចង់​ងាក​មក​ផលិត​ម៉ាស៊ីន​ដែល​ជួយ​សន្សំសំចៃ​ដល់​អ្នកប្រើ​ប្រាស់​ ប្រភេទ​រថយន្ត​ធុន​ធំ​របស់​ខ្លួន​។ ទោះជា​យ៉ាងនេះ​ក្ដី​ Lexus​ ក៏អាច​នឹង​បញ្ចេញ​នូវ​ជម្រើស​ម៉ាស៊ីន​ច្រើន​ សម្រាប់​អតិថិជន​របស់​ខ្លួន​ធ្វើការ​ជ្រើសរើស​យក​ទៅ​ប្រើប្រាស់​ ព្រោះ​កាលពី​ខែតុលា​ កន្លងទៅ​ ក្រុមហ៊ុន​ Toyota​ Lexus​ ទើបតែ​បាន​ចុះបញ្ជី​ពាណិជ្ជកម្ម​លើ​និមិត្តសញ្ញា​ ឡូ​ហ្គូ​ថ្មី​មួយ​ គឺ​ LX​ 600​ ដូច្នេះ​ ម៉ាស៊ីន​របស់​រថយន្ត​ Lexus​ LX​ ស៊េរី​ឆ្នាំ​ក្រោយ​ៗតូច​ ឬធំជាង​ Lexus​ LX​ 570​ នៅ​មិនទាន់​ផ្លូវ​ការណ៍​នៅឡើយ​។

Lexus​ LX​ 570​ គឺជា​រថយន្ត​ធុន​ធំ​បំផុត​របស់​ក្រុមហ៊ុន​ Toyota​ ដែល​ត្រូវ​បាន​រចនា​ឡើង​ប្រកបដោយ​អានុភាព​ មានអំណាច​ពេល​បើកបរ​លើ​ដងផ្លូវ​ និង​ប្រកប​ប្រណិត​ភាព​ដ៏​អស្ចារ្យ​ ព្រម​ជាមួយ​ការ​បំពាក់​បច្ចេកវិទ្យា​ទំនើប​ឈានមុខ​របស់​ក្រុមហ៊ុន​ថែមទៀត​ផង​។ តួរ​ថយន្ត​ខាងក្រៅ​ រឹងមាំ​ ខ្លាំង​ អាច​បើកបរ​ឡើង​/ចុះ​ទីទួល​ ឬផ្លូវលំ​បា​កៗ​បាន​ដោយ​រលូន​ ជាមួយ​ការ​បំពាក់​ម៉ាស៊ីន​ V8​ ចំណុះ​ ៥,៧ លីត្រ​ ដែល​ផ្តល់​ថាមពល​វិល​កង់​ទាំងបួន​គ្រប់ពេល​។ សម្រាប់​ទីផ្សារ​កម្ពុជា​ រថយន្ត​570​ ស៊េរី​ឆ្នាំ​ 2020​ ក៏​មាន​ដាក់​លក់​នៅ​តាម​កា​រ៉ា​ស់​ធំៗ​មួយចំនួន​ និង​ទទួលការ​កុម្ម៉ង់​ផង​ដែរ​ ដោយ​តម្លៃ​ប្រហាក់​ប្រហែល​ 25​ម៉ឺន​ដុល្លារ​តែប៉ុណ្ណោះ​៕ ​

សូមណែនាំអត្ថបទសម្រាប់អ្នក