បែកធ្លាយរូបភាពរថយន្តPick Up Hyundai Santa Cruz បើកបរ​បង្អួតរាងកាត់ព្រិលមុនថ្ងៃ​ប្រកាស​ចេញលក់

រូបថតជាច្រើនសន្លឹក ត្រូវគេប្រមាញ់បាន សង្ស័យជារថយន្តPick Up Hyundai Santa Cruz កំពុងបើក​លេង​កាត់ព្រិល បែក​ទឹកកកខ្ចាយ

sambo 2019
06 កុម្ភ: 2020
05:31 pm
រូបភាពពី​ទស្សនាវដ្តីពិភពអេឡិចត្រូនិក
រូបភាព Automotive Cambodia

គិត​មកទល់​ពេលនេះ រយៈពេល5ឆ្នាំហើយ ដែលក្រុមហ៊ុនរថយន្ត Hyundai ប្រកាស​ពី​គំរូរថយន្ត Pick Up ដំបូងបំផុតរបស់ខ្លួនថា នឹង​ចេញ​លក់​លើ​ទីផ្សារ ធ្វើ​ឲ្យ​អតិថិជន​​អន្ទះសារ​ចង់ឃើញពីរូបរាងដ៏​ស្រស់ស្អាតមួយនេះ។ កាលពីចុង​ឆ្នាំ2019កន្លងទៅ អ្នកតាមដាន​ពី​ការ​ផលិត​រថយន្តមូយចំនួន បាន​អះអាងថា រថយន្ត Pick Up Hyundai Santa Cruz អាច​នឹង​បង្ហាញខ្លួន​លើ​ក​ដំបូងបំផុតនៅ រដ្ឋAlabama សហរដ្ឋអាមេរិក ហើយថា រថយន្ត Hyundai Truck នេះ ទំនងជាផលិតចេញមក ក្នុង​ទំហំ​តូចជាងប្រភេទរថយន្ត Pick Up Chevy Colorado, Ford Ranger, GMC Canyon, Honda Ridgeline, Jeep Gladiator, Nissan Frontier និងរថយន្ត Toyota Tacoma ជាដើម។

ស្ថិតក្នុងអន្តរកាលនៃ​ការ​រងចាំ ចង់ដឹង ចង់ឃើញពី​រូបរាងពិតប្រាកដរបស់រថយន្តស៊េរីថ្មី Hyundai Santa Cruz នេះ ស្រាប់​តែមាន​រូបភាព​បែកធ្លាយជាច្រើនសន្លឹក ត្រូវ​បាន​គេ​លួចថតបាន ហើយត្រូវ​គេ​ដាក់ការ​សង្ស័យថា ​រថយន្តដែលកំពុងជិះបើក​លេង​កាត់ព្រិល បែក​ទឹកកកខ្ចាយនោះ គឺ Hyundai Santa Cruz តែម្ដង។

​រូបថតរថយន្ត ដែល​ត្រូវ​គេ​លួច​ប្រមាញ់បាននោះ មាន​ការ​បិទបាំងខ្លះៗ ប៉ុន្តែ​រូបភាព​ផ្នែកខាងមុខរបស់រថយន្តកំពុងរត់កាត់​ព្រិលនេះ អាចឲ្យ​គេ​ប៉ាន់ស្មានថា គឺ​ជា​ប្រភេទរថយន្ត​ Pick Up មួយរយភាគរយ ហើយ​ផ្នែក​ខាងមុខ ទៀតសោត មានការ​ឌីហ្សាញ​កាត់​ទៅ​រក​រថយន្ត Hyundai Kona ថែមទៀតផង។ មតិខ្លះទៀត ថាផ្នែកខាងមុខនេះ កាត់​ទៅ​រក​រថយន្ត Hyundai Tucson ច្រើនជាង ហើយថារថយន្ត Pick Up Hyundai Santa Cruz នេះ នឹង​បំពាក់​ប្រភេទម៉ាស៊ីន Theta3 ចំណុះ 2.5លីត្រ ស៊ីឡាំង4 និង​មានប្រអប់លេខ 8លេខអូតូ។ ទោះបី​ជា មិនមានប្រភពផ្លូវការ បញ្ជាក់ពី​ថ្ងៃបង្ហាញខ្លួនរបស់រថយន្ត Hyundai Santa Cruz ក៏ដោយ តែ​មជ្ឍដ្ឋាន​ទូទៅ បាន​ព្យាករណ៍​ថា ការ​ដាក់បង្ហាញ​ជាសាធារណៈ​នៃ​រថយន្តស៊េរីថ្មីនេះ អាច​នឹង​ធ្វើ​ឡើង​នៅ​ចុង​ឆ្នាំ 2020នេះ៕

សូមណែនាំអត្ថបទសម្រាប់អ្នក