5ចំណុច​រថយន្ត Toyota 4Runner TRD Pro ឆ្នាំ2020 កំពុងចាក់ចំបេះដូង​អ្នកប្រើប្រាស់នៅសហរដ្ឋអាមេរិក (មានវីដេអូ)

រថយន្ត Toyota 4Runner TRD Pro កំពុងក្រសោប​ប្រជាប្រិយភាពកាន់តែខ្លាំងលើ​ទឹកដីសហរដ្ឋអាមេរិក

sambo 2019
26 កុម្ភ: 2020
03:06 pm
រូបភាពពី​ទស្សនាវដ្តីពិភពអេឡិចត្រូនិក
រូបភាព Automotive Cambodia

កាលពីឆ្នាំ2019 4Runner លក់​ដាច់​រហូត​ដល់ 131,000គ្រឿង លើ​ទឹកដីអាមេរិក តាមពីក្រោយ​ចំនួនលក់ប្រចាំឆ្នាំ2018 ដែលរថយន្តរបស់ក្រុមហ៊ុន Toyota ដដែលនេះ លក់បាន​ 139,000គ្រឿង ហើយទទួលបានជោគជ័យលើការបំបែកកំណត់ត្រាលក់​ដាច់​ជាប្រវត្តិសាស្ត្រលើ​រថយន្ត​ម៉ូឌែលនេះ ជាង35ឆ្នាំកន្លងមកនេះ។

ដើមឆ្នាំ2020នេះទៀតសោត រថយន្ត Toyota 4Runner TRD Pro ស៊េរីចុងក្រោយ ឆ្នាំ2020 ដែលបន្ថែមជម្រើសពណ៌ត្រីអ៊ី(ពណ៌ទាហ៊ាន)នេះ កំពុង​ទទួលការ​បញ្ជាទិញ​​ជាហូរហែ​ក្នុង​ទីផ្សារ​រថយន្តសហរដ្ឋអាមេរិក រហូត​ជាប់ងារ​ថា ជា​ប្រភេទរថយន្ត SUV ដ៏​លេចធ្លោរ​មួយនា​ដើមឆ្នាំនេះ។ តើចំណុចទាក់ទាញអ្វីខ្លះ ធ្វើ​ឲ្យ​រថយន្ត​ Toyota 4Runner TRD Pro ឆ្នាំ2020 ក្រសោប​ប្រជាប្រិយភាពកាន់តែខ្លាំងដូច្នេះ?



1. ការឌីហ្សាញ​ចេញមករាងកាចសឹងគ្រប់កន្លែង

ដោយសារ​តែ​ពណ៌ខាងក្រៅ ជាពណ៌ត្រីអ៊ី គួបផ្សំនឹង​ការ​ឌីហ្សាញ​រូបរាងចេញមក​អំណាចជាងមុន លំអរដោយយ៉ាន់ និងកង់​ជាប្រភេទ off-road ពណ៌ខ្មៅក្រឹប ដំបូល​ខាងលើ​មាន​តំឡើងមក​នូវ​កាង​សម្រាប់​ផ្ទុកឥវ៉ាន់មកស្រាប់ ប៉ាណាមុខរាងសំណាញ់ៗរំលេច​ដោយ​អក្សរឡូហ្គូ Toyota ផ្នែកខាងក្រោមម៉ាស៊ីនមាន​បន្ទះលោហៈការពារការកកិតឆ្កូត បាន​ប្រែក្លាយ​រថយន្ត Toyota 4Runner TRD Pro ឆ្នាំ2020 ជាប់ជា​រថយន្ត​គោលដៅ​សម្រាប់អ្នក​ចូលចិត្ត​បើកបរលើគ្រប់​ស្ថានភាពផ្លូវ។

2. មានសមត្ថភាពពុះពារបានគ្រប់ស្ថានភាពផ្លូវ

ក្រុមហ៊ុនToyota ផលិត​ 4Runner TRD Pro ឆ្នាំ2020 នេះមក ផ្ដោត​សំខាន់​លើ​ការ​ធ្វើ​ការងារ​ធ្ងន់ៗ ប្រឡូកប្រឡាក់បានគ្រប់ស្ថានភាពផ្លូវតែម្ដង។ ប្រព័ន្ធគ្រឿងក្រោម បូមប្រភេទ FOX Shockនិងយ៉ាន់Alloy ទំហំ 17អ៊ីញ កង់រថយន្តប្រភេទ Nitto Terra Grappler គឺមានលក្ខណៈសម្បត្តិគ្រប់គ្រាន់ សម្រាប់​យក​ទៅ​វឹកវឺនគ្រប់ផ្លូវលំបាកៗ មិនចាំបាច់ថ្នមកម្លាំងឡើយ។ ក្នុងនោះមុខងារសម្រាប់បើកបរ​ ក៏​ត្រូវបាន​បំពាក់នូវ Multi-Terrain មានន័យថា អ្នកបើកបរ អាច​សារ៉េ​ជ្រើសរើស​ឲ្យ​រថយន្តធ្វើការ ស្រប​ទៅតាម​ស្ថានភាពផ្លូវ មិនថាផ្លូវចុះទឹក ឡើងចំណោត ផ្លូវភក់ ខ្សាច់ ឬ​ផ្លូវ​រអិលនោះទេ។

3. ប្រើប្រាស់បច្ចេកវិទ្យាខាងក្នុងទាន់សម័យ

Toyota 4Runner TRD Pro ឆ្នាំ2020 បំពាក់ដោយម៉ាស៊ីនទំហំ 4.0លីត្រ ស៊ីឡាំង6 អាច​បញ្ចេញកម្លាំងដល់ 270សេស ប្រើ​5លេស ស្វ័យប្រវត្តិ។ កាប៊ីនខាងក្នុង បំពាក់​នូវ​បច្ចេកវិទ្យាទំនើបៗចុងក្រោយគ្រប់គ្រាន់យ៉ាងទាន់សម័យ ដូចជា៖ អាចប្រើជាមួយ Apple CarPlay, Android Auto មានSpeaker JBL Systemចំនួន15 គ្រាប់ មានប្លូធូស, Wifi មានកម្ដៅកៅអី ដំបូលបើកបាន ទាំងអស់នេះហើយ ធ្វើ​ឲ្យ​កេរ្តិ៍ឈ្មោះរបស់ 4Runner TRD Pro ជាប់ក្នុងតារាង​ប្រជាប្រិយភាពសម្រាប់ប្រជាជននៅអាមេរិកកាន់តែខ្លាំងឡើងៗ។

4. មានទំហំធំទូលាយល្អ

4Runner 2020 មិនត្រឹមតែជារថយន្តប្រភេទ off-road តែមួយមុខទេ តែ​ក៏អាច​ប្រើ​បាន​ជាលក្ខណៈ​រថយន្តបែបគ្រួសារយ៉ាងទាន់សម័យផងដែរ។ ផ្នែកខាងក្រោយមាន​ទំហំ​ធំទូលាយល្អ កៅអីជួរក្រោយអាចបត់ចុះឲ្យរាបស្មើ​បាន បាតរថយន្តខាងក្រោយមានក្ដាអាច​ចល័តចេញក្រៅបាន ងាយស្រួលដល់ការអង្គុយ​លេង កញ្ចក់ទ្វារក្រោយ ខាងលើអាច​បើកបាន ងាយស្រួលដល់ការ​លើកដាក់ឥវ៉ាន់ ដោយមិនចាំបាច់បើកទ្វារឡើយ។

5.    តម្លៃសមនឹង​សមត្ថភាព

ក្រុមហ៊ុនតូយូតា លើកនេះ ហាក់ដូចជា​លះបង់​ច្រើន លើ​ការ​បំពាក់នូវ​បច្ចេកវិទ្យា និង​ការកែខៃ​លើរថយន្ត Toyota 4Runner TRD Pro ឆ្នាំ2020នេះ។ ទោះបីជា​ការ​ចំណាយ​លើ​ថ្លៃ​ដើមផលិត​ខ្ពស់ក៏​ពិតមែន ប៉ុន្តែ​ក្រុមហ៊ុនបាន​ដាក់តម្លៃលក់ត្រឹម​តែ 49,865$ (តម្លៃក្រៅស្រុក)តែប៉ុណ្ណោះ៕ ​

សូមណែនាំអត្ថបទសម្រាប់អ្នក