Land Rover Defender ឆ្នាំ2020 ​មានតង់ហ្ស៊ីនលើដំបូលមកស្រាប់ អាច​ចូលគេង​បាន​គ្នា ​2នាក់យ៉ាងស្រួល!

ត្រូវចិត្តអ្នកបោះតង់ប៉ាច់តែម្ដង!

sambo 2019
23 មិថុនា 2020
06:02 pm
រូបភាពពី​ទស្សនាវដ្តីពិភពអេឡិចត្រូនិក
រូបភាព Automotive Cambodia

រថយន្ត Land Rover Defender ដែល​ល្បីល្បាញខាង off-road យូរឆ្នាំ ខាង​លុកលុយដើរព្រៃ ឡើងភ្នំ ចុះទឹក ពេលនេះ សម្រាប់ម៉ូឌែលឆ្នាំ2020 ដែល​ផលិត​នៅ​សហរដ្ឋអាមេរិច ត្រូវ​បាន​បំពាក់​មកស្រាប់ ​ជាមួយដំបូលតង់ ដើម្បី​បំពេញចិត្តអ្នក​និយម​វិសមកាលតាមឡាន ដេកផ្លូវបោះតង់ជាដើម។  

ក្រុមហ៊ុន Land Rover អះអាងថា តង់​ដំឡើង​មក​ថ្មី នៅ​បន្តុប​ពីលើ​ម៉ូឌែល Land Rover Defender 110 ឆ្នាំ2020 នេះ ផលិត​មក​មាន​គុណភាពរឹងមាំ ល្អ ដូចទៅនឹង​រថយន្តអ៊ីចឹង។ នៅ​ខាងក្នុងតង់ មានកម្រាលពូកកប្បាសទន់ល្មើល ​ទំហំ​សមល្មម អាច​អនុញ្ញាតឲ្យ​មនុស្ស​ចូលគេង​បាន​គ្នា2 នាក់​បាន​យ៉ាងស្រួល និង​កក់ក្ដៅបំផុត។ ឈុតតង់ដដែលនេះ ក៏មាន​ខ្នើយកើយមួយឈុត អំពូលបំភ្លឺប្រភេទ LED និង​ចំហៀង​ទុក​ដាក់អីវ៉ាន់បានថែមទៀតផង។

ដំបូល​តង់របស់ រថយន្ត Land Rover Defender 110 ស៊េរីឆ្នាំ2020 នេះ សក្តិសមជាដៃគូររួម​ដំណើរ​ផ្លូវឆ្ងាយបែប​ផ្សងព្រេងជាមួយ​លោកអ្នក ដែល​ស្រលាញ់​ចូលចិត្តធ្វើដំណើរ​ផ្លូវឆ្ងាយ off-road មែនទែន។  សម្រាប់តម្លៃតង់ បន្តុប​លើ​ដំបូងរបស់ Land Rover ថ្លៃប្រហែល 3,454$ ៕

ប្រភព៖ carbuzz


សូមណែនាំអត្ថបទសម្រាប់អ្នក